।।मनहरण घनाक्षरी।।

।।मनहरण घनाक्षरी।।
रोज रोज गारी देत, सबके खबर लेत,
करके चारी चुगली,बानी ला लगाय हे।
सुने न काकरो बात,आथे घर मा वो रात,
करके जी मनमानी, पीके दारू आय हे।
बोली देख लड़खात,गोड़ हाँथ ल हलात,
पीके सिगरेट अब,धुआँ ल उड़ाय हे।
चिंता नइये धन के, करे अपने मन के,
भरे लालच मन मा, आँखी ल गड़ाय हे।

।।छप्पय छंद।।

छप्पय छंद  - राजेश कुमार निषाद
(1) होवत बिहना रोज,काम मा वोहर जाथे।
बेरा देखत शाम,थके माँदे घर आथे।
पालन कर परिवार,मेहनत जादा करथे।
कमा कमा के रोज,पेट ल सबके भरथे।
घर के मुखिया वो हरे, देथे सबो धियान ला।
काहीं कम झन होय जी,लानय सबो समान ला।

(2) सुख दुख जिनगी मोर,लगे हे आना जाना।
मानुष तन के जात, कहाँ जी हवय ठिकाना।
आये खाली हाथ,छोड़ जी सबला जाहूँ।
नइये मोला लोभ,फेर काबर पछताहूँ।
करके सबले जी मया, सुख ला मैं हर पाँव गा।
कइसे मन के बात ला,सबला मोर बताँव गा।

(3) चलना संगी आज,हमन गा मंदिर जाबो।
करबो पूजा खास,चरण मा माथ नवाबो।
देथे जी वरदान, हवय प्रभु अंतर यामी।
लेके चलथे साथ,सरग के हावय धामी।
करहू झन गा पाप ला,देवव प्रभु ला मान जी।
प्रभु हे पालन हार गा, सबला दे वरदान जी।

(4) सेवा करके तोर,हमन जस ला सब गाबो।
आके दाई तोर,चरण मा माथ नवाबो।
हवन शरण मा तोर, हमर तैं लाज बचा दे।
अपने लइका जान,भाग ला हमर जगा दे।
करलव सेवा रोज गा, माता के दरबार मा।
अइसन मउका अउ कहाँ, मिलही गा संसार मा।

छंदकार - राजेश कुमार निषाद ग्राम चपरीद जिला रायपुर छत्तीसगढ़

।।अमृत ध्वनि छंद।।

।।अमृत ध्वनि छंद।।

सेवा दाई के करव, मिलही अँचरा छाँव।
करथे सबले जी मया, जेकर कोरा ठाँव।।
जेकर कोरा,ठाँव बनाबे,दुलार पाबे।
भाग जगाबे,नाम कमाबे,मान बढ़ाबे।
संगे जाबे, हरिगुण गाबे,मानव माई।
सरग ल पाबे,करके आबे,सेवा दाई।। (1)

लागय भारी जाड़ जी,महिना अगहन आय।
देखत आगी आँच ला,तापे बर सब जाय।।
तापे बर सब,जाय भागत, लकड़ी लावत।
आग जलावत,जाड़ भगावत,बइठे तापत।
रात ल जागत,मजा उड़ावत, सबझन भागय।
घर सब जावत, मिलके काहत,जाड़ ह लागय।।(2)

मटका फोड़न गाँव मा,करके अड़बड़ शोर।
चढ़के संगी सब सखा,बाँधन मटका डोर।।
बाँधन मटका,डोर धरे हे, रंग बिरंगी।
आमा पाना,केरा नरियर, सबझन संगी।
खाके माखन, मारत हावय,देखव चटका।
हँसी खुशी ले ,फोड़व सबझन,एसो मटका।। (3)

मतगयंद सवैया

।।मतगयंद सवैया।।
तैं सुनले कहना  करहूँ बहिनी अब मैंहर तोर अगोरा।
तोर मया कइसे छुटही सुन आवत हावय देखव पोरा।।
आज सबो करके रखले बहिनी अपने सब तैंहर जोरा।
तोर सखी मन पूछत हावय की कब आवत हे मनटोरा।।