।। जय हो तोर छत्तीसगढ़ीन मईयाँ ।।

।।जय हो तोर छत्तीसगढ़ीन मईयां।।
जय हो तोर छत्तीसगढ़ीन मईयां
परत हावंव तोर पईयां।
सुत उठ के होवत बिहनिया चरण तोर पखारंव।
मैं छत्तीसगढ़िया तोर लईका दाई
तोरे गुण ल गावंव।
सुरूर सुरूर हवा चले
पुरवाही म पाना डोले
कुहु कुहु बोले कोयली
नाचे मोर सोन चिरईया
जय हो तोर छत्तीसगढ़ीन मईयां
परत हावंव तोर पईयां
महर महर ममहावय तोर माटी
जेमा खेलन भउरां बांटी
तोर माटी म उपजय सोनहा धान
ये तोर माटी हे महान
हरियर हरियर दिखे रुखरईया
जय हो तोर छत्तीसगढ़ीन मईयां
परत हावंव तोर पईयां
चरण तोर पखारे महानदी अरपा पईरी
तोर कोरा म सब खेले नई हे कोनो बईरी
सब ल तै जीवन देवईया
जय हो तोर छत्तीसगढ़ीन मईयां
परत हावंव तोर पईयां

राजेश कुमार निषाद
ग्राम चपरीद समोदा
9713872983